പുറത്തൊന്നും വിട്ടെന്നെ
കാഴ്ചകൾ കാണിക്കൊല്ലേ
ഞാനെത്ര തടഞ്ഞാലും
എന്മനവും തിരിഞ്ഞേക്കാം
കണ്ണും കാതും കൈയും
മൂക്കുപോലും മറയ്ക്കാതെ
ഏതോ പെണ്കൂട്ടങ്ങൾ
നാട്ടിലൊക്കെ നടക്കുന്നു
മിണ്ടുന്നു പലരെന്നോടും
ചിരിക്കുന്നു കളിക്കുന്നു
സ്കൂളിലൊക്കെ പോകുന്നു
പഠിക്കുന്നു പഠിപ്പിക്കാൻ
അവരൊന്നും നമ്മളല്ല
നമ്മളെപ്പോലാവില്ല
എനിക്കുണ്ടാ വെളിപാട്‌
വീറും വിശ്വാസവും
എങ്കിലും അച്ഛാ ചേട്ടാ
നാട്ടിലേക്കൊക്കെ വിട്ടെന്നെ
കാഴ്ചകൾ കാണിക്കൊല്ലേ
എന്മനവും തിരിഞ്ഞാലൊ
നാം നമ്മുടെ മനവും മേനിയും
അടച്ചു പൊതിഞ്ഞു വയ്ക്കണം
കാറ്റു കേറി ദുഷിച്ചെന്നാൽ
പോയില്ലേ ഇജ്ജന്മ സാഫല്യം
അതുകൊണ്ട് ചേട്ടാ അച്ഛാ
എന്നെ കൂട്ടിലിട്ടു വളർത്തേണം
നാട്ടിലേക്കൊന്നും നോക്കാതെ
കണ്ണും നന്നായി കെട്ടണം
No comments:
Post a Comment